為什麼會發生文化大革命？ 都是因為中國窮！

 

 

旁晚，走進一條小橫街，經過一間沒有什麼粉飾外舖的上海理髪店，門口的理髮旋轉燈箱都被熏黃得什麼顏色也分辨不出來。

大門的玻璃只是用上一幅頗殘舊的布蓋上，我稍稍伸長了頸便能看盡店內情況。店內沒有任何顧客，只見老闆躺在理髮椅上，伸著懶腰。

我推門進便順勢叫著：＂師傅，剪頭髮，單剪。＂

師傅從容的起來，看著我並笑笑口的跟我說：＂嘩邊個幫你剪㗎個頭！…… 坐邊到都得。＂

師傅走到身旁的升盤洗手

我回答：＂係咪就係嗰尐五十蚊十分鍾攪掂嗰尐囉！＂

師傅：＂嗰尐𡃁仔邊到得㗎！＂

師傅講廣東話帶一點上海口音，可能他來了香港已經一段長日子。

簡單說過我想要的髮型，師傅便毫不猶豫地拿起電鏟開始修剪髪鬢。

收音機正播放晚間新聞，講述當日佔中的情況。從這刻開始，最不想出現的情況發生了。

師傅開始大發牢騷起來：＂班死仔有書唔讀走哂出嚟佔中，阻住晒尐交通,又喺度打乒乓波丶燒野食，攪到亂晒，叫共產黨嚟鏟走晒佢地啦！

美國係後面攪攪震,嗰班律師全部都係美國支持喺攪攪震，要共產黨嚟鏟晒佢地成班走先得…….＂（當然其中會加插很多粗口, 份量跟一般中年大叔相約。）

我知道即使怎樣跟他理論駁火，也不會有一點機會改變他對事件的看法，況且佔中問題並不是非黑即白可以𧗾量出結論來, 

更重要的是我的頭在他手上。

所以我便無骨氣的，笑著回應：＂師傅，咁你即係話叫習近平命令尐解放軍駛坦克車入嚟好似六四咁樣鏟佢地走呢？＂

師傅繼續但彷彿完全聽不進我的問題：＂唔係…..比著我做，我就會叫共產黨落嚟鏟走晒佢地。嗰班死仔，政府講乜都唔聽，似乜野，攪到好似文革咁…….＂

我問：＂係呀文革嗰時好慘呀！＂

師傅聲音低下來：＂係呀＂

我繼續問：＂師傅文革嗰時係邊到呀？我阿爸媽戰後已經落咗嚟，所以知道的唔係好多。＂

師傅回答：＂係上面…..＂

之後聲線轉得瞭亮繼續說：＂香港政府咁鬼軟弱，你睇梁掁英被班律師同埋班𡃁仔恰能到，喺大陸一定死鳩晒…..＂

我再問：＂師傅，咁有幾慘呀文革嗰陣時？

師傅又把聲線沉下來，說：＂尐有錢佬被抄家，尐人尐老豆老母都被批鬥囉…..＂

我還未讓他說完，便追問：＂嘩都好殘喎，咁批鬥咗之後會有乜刑罰呀？＂

師傅:＂蹪玻璃呀，被打死呀……”

我接上：＂放飛機呵？！”

師傅: ” 係呀。＂

我：＂咁佢地犯咗乜事要受到咁嘅刑罪？＂

師傅: “係咪貪污呀之類,嗰陣時好多㗎，而家就小咗啦，呢班律師係咪貪污囉，美國比嘅尐錢。＂

我：＂師傅你點知嘅？＂

師傅：”尐報紙登晒出嚟啦，收咗人地千幾萬嘛。＂

我：＂吓！審咗出嚟啦？＂

師傅：＂仲使審嘅，拉能晒佢地啦。＂

我：＂咁點呀，要晒佢地蹟玻璃丶放飛機。＂

師傅：＂拉哂佢地啦。＂

我：＂咁文革嗰陣時，有冇審嗰尐拉咗嘅有錢佬丶地主？＂

師傅：＂邊到有審呀，啲紅衞兵話批鬥你咪就捉你囉。＂

我：＂係喎，尐紅衞兵仲係好後生㗎喎。＂

師傅：＂係咪好似而家嗰班𡃁仔咁囉，政府講尐野完全都唔聽嘅，無法無天。＂

我：＂咁邊個比紅衞兵咁大權㗎？＂

師傅：＂毛澤東囉, 嗰時同劉少奇爭權嘛。＂

我: “但係佔中班學生係無權喎，如果唔係政府都唔會清場啦，佢地係人民自發㗎喎。＂

師傅哼的一聲：＂美國佬攪㗎嘛，如果唔係邊到嚟個膽呀。＂

我：＂都好慘喎，文革一亂就十年，之前又大躍進又大飢荒，點解會咁嘅大陸？＂

師傅：＂人民窮囉。＂

窮可能是罪黨魁禍首，但倒要問點解會這麼窮呢？總想到中國人傳統的農民思想，怨不到主帥頭上，只怪自己命不好。

我並不能感受到他在這個年代對生命價值的體驗，正如他永遠也不會明白這一輩年靑人的理念和渴求。

但可以相信在這𥚃仍然能夠包容著不同人有著不同信念的追求，仍然容許你去堅持個體的理念，但這些種種並不是必然存在的，現在我們正是從頭學起吧。

我：＂師傅邊到人呀？＂

師傅：＂上海＂

我：＂上海已經搵唔到上海理髮老師傅了，差唔多全都是後生髪型屋嗰尐。我幾年前係上海住過一排，搵極都搵唔到。＂

師傅: “ 嗰尐𡃁仔邊道識剪㗎…………”

P.